野豬出城搵食 馬仁威：要反思保育政策

《東方日報》，2020/4/19

保育郊野，除咗林木河谷花草溪流，以山野為家嘅「原住民」亦不可忽視。有行山習慣嘅M體育會會長馬仁威，疫情之下到山徑遠足嘅次數就更加頻密。佢留意到近年來，野豬嘅出沒範圍大咗好多，就連市區亦見其蹤影，摷垃圾桶覓食造成衞生問題，市民不勝其擾。不過，馬仁威認為野豬都係迫不得已，仲話大家都要反思一下，乜嘢係保育。

馬仁威話野豬冒住生命危險走出市區覓食，極有可能係郊野搵食艱難。而市民喺郊野公園嘅活動，難免會對棲息於野外嘅動物構成一定嘅干擾，到底現行嘅保育政策是否存在漏洞呢？佢認為政府同市民都要好好反思。佢又聽聞有人非法獵殺野豬，令人懷疑是否同近來活豬供應緊張有關。所以佢呼籲市民喺街邊見到有黑毛豬賣就要小心啲，要了解供應來源，若果來歷不明就唔好買喇。而相關政府部門亦要加強執法，拘捕非法捕獵者。

港野豬有人餵食 體形較大

菁英會副秘書長馬家強不時同家人到郊外露營，佢話見野豬喺營地附近出沒，小朋友係有少少驚恐，不過佢解釋話野豬都係大自然嘅一部分，只要唔餵食或騷擾對方，咁就相安無事。佢又認為欠缺天敵剋制以及一次可生多胎，都係野豬數目增多嘅原因。為咗生態平衡，佢主張控制野豬嘅數量，不過採用邊種方法，就要留待社會深入討論。

足迹遍及本地同海外山野嘅傑青吳俊霆，佢話同外國比較，香港野豬體形較大，加上本應對人有戒心嘅野豬，愈來愈唔怕人，可能係習慣有人餵食所致。由於成年嘅野豬可以有兩個人咁重，若果對人發動攻擊的話可以造成好大嘅傷害。所以一旦見到野豬的話，最好嘅做法當然係保持距離喇。