政府發展「北部都會區」，其中洪水橋／厦村新發展區正進行第二段收地階段，包括位於洪水橋亦園的羊場。負責人小玲姐知悉收地至今兩年來，仍未覓得合適地方搬遷。她12月初獲地政處通知，須在1月底遷走。
收地在即，逾600隻羊將無棲身之所，甚至面臨人道毀滅的結局。小玲姐祈求政府及公眾協助尋找合適地方安置羊群，讓牠們「逃過一死」，「其實千幾尺都得，只要近山頭，遠離民居唔好影響到人就得。」，「是旦俾條路我行到上去，我哋就可以匿喺嗰度。」
亦園羊場佔地約7,000尺，位置鄰近浦瓜嶺、圓頭山山腳及深圳灣公路大橋橋底，地點偏僻，沒有交通直達，須經亦園村路進入。《獨媒》上周六（12月13日）探訪羊場，附近多幅土地已被圍封水馬，標示為已被政府徵收土地，亦有大型挖泥等的工程車出入。
廿多年間兩隻羊變數百隻 免費供大學進行研究及實習
負責人小玲姐望向數百隻羊，稱「其實羊唔係我想愈養愈多」。小玲姐最初「為興趣」以寵物形式在鶴咀村飼養兩隻羊，後來得悉西貢有人棄養廿多隻羊，於心不忍半買半領養接收全部羊隻。由於羊隻數量增加，她被村民向漁護署投訴，先後搬遷至屯門掃管笏的養豬場及山頭地飼養。期間，小玲姐開始提供羊隻予大學作研究，十多年間羊群數量增至數百隻。
盼政府協助覓地
羊場範圍屬於洪水橋／厦村新發展區第二期發展計劃，去年地政處張貼告示，原定今年7月10日遷出。小玲姐早於2023年得知將會收地發展時，已開始四處覓地搬遷，但一直未覓得合適地方，至11月中地政處職員親自落場通知12月中必須遷出。
她表示，曾先後向地政處及漁護署求助覓地，惟各政府部門「都無回覆，一個彈一個，我都唔知點樣，都唔知點樣唔知去邊，係收到定收唔到，又無覆得我，究竟我呢個位置係咪真係要走」，更被警告「你唔走呢，嗰日人哋嚟就要咁樣行出去，啲羊就漁農署一框框、一車車咁車走，人道毀滅㗎啦。」
求助無門的小玲姐於12月上旬，再獲地政總署清拆組到場通知，羊場必須在2026年1月底前搬走，她向職員求助，只獲回覆稱「大家盡量努力去搵，睇下搵唔搵到合適地方（安置）」，若覓得地方將會給予時間搬遷。小玲姐強調絕對配合政府發展，不求金錢補償，只祈求政府協助尋找平租、遠離民居的地方安置羊群，讓牠們「逃過一死」結局，「邊一個山頭都好，佢（政府）可以俾到我，我都可以養到呢一群羊就OK㗎啦。」
另一羊場負責人尹先生曾在12月2日向漁護署電郵求助，僅獲回覆指根據《公眾衞生（動物及禽鳥）（牛隻、綿羊及山羊的飼養）規例》，新界有九個地區毋須領牌飼養羊隻，包括北區、元朗區、離島區、葵青區、西貢區、沙田區、大埔區、荃灣區及屯門區，建議將羊隻交由親友或尋求其他動物福利機構處理羊隻。
小玲姐坦言，已沒有太大希望及期望，每當想到遷出限期迫在眉睫，羊群去向未明，她眼泛淚光道「我期望嘅佢次次都無，我而家變咗好失望，就愈來愈徬徨，唔知點算好，瞓唔著，諗到三更半夜瞓唔到覺，即係唔知點樣好，過咗今日都唔知聽日去邊。」
牧羊人嘆香港覓地供畜牧業漸趨困難
政府近十多年著力大興土木發展新界，小玲姐有感香港愈來愈難覓地供畜牧業，「以前無咁難搵地方搬遷，但新界愈來愈多地方發展，好多近山頭地主唔會租俾我哋，有啲唔乎合養羊要求。」
羊隻最怕淋雨，小玲姐指最理想場地為舊豬欄及白鴿場，可改建成羊棚遮雨，惟合適場地所剩無己：「唯有匿喺天橋底，羊就有個遮身嘅地方，唔會俾雨溚」，「真係好難搵而家，豬欄呀、白鴿場呀，咩都好多地方都俾人收晒啦，以前好似古洞大把啦，收晒河套，以前新界地方逐啲逐啲變咗市區又好、發展區又好，俾啲畜牧業愈來愈少，我啲羊羊好似無埞棲身。」
小玲姐請求公眾，如有乎合養羊、近山頭及有道路運輸食物的私人地方，盼「平平地租俾我哋」，強調「其實千幾尺都得，只要近山頭，遠離民居唔好影響到人就得，同埋唔好食到人哋種嘅嘢，就往山邊跑就OK，是旦俾條路我行到上去，我哋就可以匿喺嗰度。」
文章
