《蘋果日報》，2021/2/1
2005年落選港姐李思雅日前在社交網透露，帶了自己其中一隻年老的貴婦狗Quirky往看獸醫檢查牙齒，怎料不幸遇上無良獸醫，11歲的Quirky不但一次過被剝掉17隻牙齒，令牠不能進食，更導致雙目失明。作為主人的李思雅因同意愛犬被剝牙而遭網民指摘「白癡」，而她亦坦認：「好唔安樂！」不停自責。
一直酷愛飼養狗隻的35歲體育主持李思雅，目前養有迷你貴婦狗及約瑟爹利，不時帶同愛犬行山及跟男友拍拖，她日前在Ig透露早前帶已11歲的灰色貴婦狗Quirky去睇牙，怎料卻去了黑店及遇到無良醫生：「個醫生話佢腎有事要留院吊鹽水，又要我買一堆配方糧，未剝牙前已經要你使一筆錢。」當決定狗狗麻醉後洗牙，醫生忽然向李思雅指要即時剝掉17隻牙，最後她惟有相信醫生，但剝完牙後愛犬卻突然兩眼失明，李思雅鬧爆該動物醫院「搶錢兼醫死狗」。
麻醉洗牙突變做手術
昨日李思雅接受傳媒訪問，為何會答允簽字讓狗狗剝17隻牙？她解釋：「醫生話佢啲牙石太多，會感染到其他牙，所以就將受感染嘅牙剝晒。」事後她曾問醫學界朋友，指愛犬有機會因一次過剝17隻牙，失血過多及體溫太低，導致眼神經視網膜受損。李思雅質疑該名獸醫醫療失德：「有同診所反映過，但佢哋一路都唔認係佢哋問題，我都問過喺狗診所做嘅朋友，但話好難追究，因為做手術前係簽晒紙。原來好多人都中過招，所以真係要令多啲人知道呢間係黑店，真係好過份好無良。」
談到愛犬現況，李思雅哽咽說：「佢日日唔想食嘢，又睇唔到嘢，要日日𠱁佢食嘢先得。」愛犬疑遇無良獸醫，李思雅坦認有責任，十分內疚未有去多幾間醫院查詢：「我真係好唔安樂。」事件曝光後，不少網民向李思雅留言問候及打氣，但亦有網民鬧爆她：「你一個決定害死隻狗」、「一個貪錢無良醫生加一個完全不會打理狗的白癡主人，唉！結果是那隻可憐小狗遭虐了！」
姜皓文心痛：係悲劇
「黑仔」姜皓文亦養了多隻貴婦狗，他對李思雅的情況表示同情，他昨日回覆《蘋果》謂：「係悲劇，雖然唔係我嘅小朋友，但係我都覺得好心痛。好彩我未遇過，反而朋友試過，人都會遇到唔啱嘅醫生，真係要問多幾個醫生嘅意見，希望主人同狗狗都早日心情好返。」楊秀惠養有法國老虎狗「飛雲」，她昨日表示：「好心痛，狗唔識講嘢，溝通唔到，唔知佢邊度唔舒服，所以只可以相信醫生。試過有次我隻狗撞到，佢係咁喺度叫好似好痛，情況就未必容許去睇多幾個醫生，因為都唔知緊唔緊急。」
出名愛狗的河國榮，昨日回覆時則稱：「好難畀意見，但我哋養小朋友（指狗狗）嘅人幾乎個個都會錯過，而且當你嘅小朋友已經麻醉咗，作為小朋友嘅主人，我哋好容易服從醫生嘅提議。」他指李思雅不應怪責自己，現最重要是盡力照顧愛犬，他亦勸喻主人若遇到並非關乎生死的決定時，不妨多聽其他醫生意見。
另稿:
【獸醫有責】手術前需向狗主解釋風險
李思雅的愛犬日前被獸醫一次過剝掉17隻牙，結果不幸導致失明及不能進食，她痛斥獸醫的醫德。昨日《蘋果》向獸醫陳綽姿（圖）查詢有關李思雅愛犬遇到的情況，她表示初步來看仍未知責任在於獸醫，抑或是狗仔本身有隱性疾病，兩方皆有可能，陳醫生說：「所有麻醉手術都有風險，如果麻醉出事，都可能會引致動物失明；但都唔能夠排除狗仔本身有隱疾，例如心臟病或血壓高，都會引致麻醉風險增加。作為獸醫，應喺麻醉老狗之前先做一個詳細檢查，再向主人解釋所有風險，包括麻醉有可能出現嘅狀況，例如突然停止呼吸或心跳，以及嚴重至死亡都有可能。」
問到狗隻一次過最多可以剝掉多少隻牙？陳醫生指出若狗隻做完檢查及一切評估後，在安全情況之下，即使是剝掉全口的牙齒都是可以的。
另稿:
【責無旁貸】主人過失 動物受苦
李思雅因誤信獸醫令愛犬致盲，其實過往亦有不少藝人因為無心之失或一念之差，分分鐘會令寵物身陷困境，亦可能惹上虐畜官非。
黃心美 任姨甥女虐狗
黃心穎家姐黃心美（小圖）去年8月在社交網上載半歲大的姨甥女「豆豆」的短片，片中豆豆向黃心美其中一隻愛犬Muffin掹尾、扯毛及腳踢， 黃心美不但沒阻止及教導豆豆，更形容寵物犬是「超犯賤」，網民狂轟她「冇家教」。
梁雨恩 愛貓平台走失
2019年2月，藝人兼全職女鏢手梁雨恩（小圖）家中餵養的貓貓阿Miu，在寓所一樓平台走失，平時阿Miu十分乖巧，未試過走失，所以才掉以輕心，事發後全家四處尋找不果，梁雨恩更於網上出po尋貓，幸兩日後阿Miu自行跳回家中。
鄭俊弘 電擊頸箍虐狗
2017年鄭俊弘被發現先用佈滿倒鈎鐵鏈綁愛犬Riley，遭獸醫強烈反對，事後他與何雁詩回應是訓練員建議，後來他再被翻舊賬早於2016年幫Riley戴了一條電擊頸箍散步，期間更似開遙控電Riley，而上年尾二人成婚Riley也有一同拍婚照。
洪天明 車廂獨留愛犬
曾育有多隻貴婦狗的人夫洪天明，受訪時曾經說過，早年因一時大意，駕車去九龍塘又一城的超級市場買東西時，竟意外獨留了貴婦狗於停車場的密封車廂內，時間長達45分鐘，令愛犬險些焗到窒息，事後洪天明十分內疚。
文章
