Headline Daily P10 港聞 |490 Character(s) |2023-03-16
熊貓迷注意喇，可能再有大熊貓落戶香港！立法會選委會議員梁毓偉昨日提出口頭質詢，問政府會唔會請求中央，安排多一對大熊貓來港，加強青少年嘅保育意識；環境及生態局局長謝展寰就回覆話，會積極考慮意見。海洋公園同旅遊業界代表都同小妹講，好歡迎建議，小妹都希望可以快啲成事！
梁毓偉喺立法會提出口頭質詢，關注點樣加強青年保育自然生態嘅意識，又話而家香港僅餘一對大熊貓「樂樂」同「盈盈」，政府會唔會同中央請求，安排多一對大熊貓來港，將香港打造成旅居大熊貓嘅「支援港」。謝展寰就回覆話，大熊貓代表國家同香港之間嘅聯繫，同時讓青年人加深國家嘅認識，局方會積極考慮意見。
香港旅遊促進會總幹事崔定邦就同Kelly講，世界各地旅客，普遍都喜歡參觀到動物園睇大熊貓，如果香港可以多一對大熊貓，絕對係吸引遊客嘅賣點。佢又話，海洋公園係四川成都大熊貓繁育研究基地外，保育大熊貓最成功嘅地方，強調香港幫助保育熊貓，同時亦有助振興旅遊業。
海洋公園就話，公園擁有優秀嘅動物護理團隊同設施，有足夠能力細心照料大熊貓，園方歡迎多一對大熊貓來港嘅建議，期待再有大熊貓加入海洋公園！
文章
