雀仔街虐雀｜郭秀雲：有雀鳥被磨走半個嘴 小朋友睇到佢虐待就喊

2023-08-06 20:28

原文連結在此 : https://www.hk01.com/%E7%AA%81%E7%99%BC/927105/%E9%9B%80%E4%BB%94%E8%A1%97%E8%99%90%E9%9B%80-%E9%83%AD%E7%A7%80%E9%9B%B2-%E6%9C%89%E9%9B%80%E9%B3%A5%E8%A2%AB%E7%A3%A8%E8%B5%B0%E5%8D%8A%E5%80%8B%E5%98%B4-%E5%B0%8F%E6%9C%8B%E5%8F%8B%E7%9D%87%E5%88%B0%E4%BD%A2%E8%99%90%E5%BE%85%E5%B0%B1%E5%96%8A

旺角花墟園圃街雀鳥花園疑出現虐雀老檔主，不少購買受傷雀鳥的苦主今日（6日）上門聲討，驚動警方、愛協及漁護署到場。一向愛護動物、更自費成立雀鳥保護組織的藝人郭秀雲慶幸涉案檔主被捕，又指事件已持續兩、三年，苦主們已不止一次報警求助，她指有鸚鵡被磨走半個嘴，不少更已喪命，「直情係虐待嘅行為‥‥‥小朋友睇到佢（涉案檔主）虐待就喊！」

郭秀雲今日現身雀鳥公園時表示，過往已接獲不少苦主求助，她指該檔口不少雀鳥非死即傷，有人親眼目擊涉案檔主用棍打死雀鳥，亦有雀鳥身受重傷，「磨到周圍血，冇咗半個嘴，年半先好返慢慢生，已經叫好彩！好多例子，有好多已經係死咗！」她指有人因同情雀鳥慘況而買雀，接獲求助後，曾協助介紹獸醫，亦曾幫忙照顧受傷雀鳥。

對於檔主的粗暴行為，郭秀雲不排除因檔主脾氣暴躁，「啲雀惡咬佢，佢就撳住佢個頭，扯住嚟刮佢個嘴！佢脾氣暴躁唔緊要，唔好虐待，咪做第二啲嘢囉！唔好講話係愛雀啦，直情係虐待嘅行為！」她指，虐待事件影響深遠，有孩童曾因此受驚痛哭，「小朋友睇到佢虐待就喊，我朋友話拖個女睇到打雀會喊！」

郭秀雲慶幸檔主落網，「幾好吖，希望今次成功‥‥‥大家都惆悵咗好多年，唔知點處理‥‥‥每一次有人去舉報佢（涉案檔主）嘅時候，巡一巡，一個警告，冇事發生過。」她指，愛護動物、雀鳥、鸚鵡的人愈來愈多，大家都有共鳴去保護雀鳥，大家都要發聲，因此認為設立動物警察十分重要。