Sing Tao Daily H03 馬經 |439 Character(s) |2022-02-23
新正頭剛過，疫情揮之不去，呢樣唔得，嗰樣唔准，中咗招嘅天寒地凍要瞓街，做檢測就排長龍。虎年開波，個個慘過梁天來，苦過金葉菊。百業蕭條，最慘係做飲食，就算以前搵落，個底再厚豐衣足食，暫時短期內都好難扭轉乾坤，充其量得個捱字，夠交租出糧已頂呱呱，唔信問吓行內人，根本睇唔到前景，柴米油鹽醬醋茶開門七件事，水電樣樣都係錢，個個安心在家無幫襯，有都不外買兩餸飯。普羅大眾尚且如此，馬主行列更加難頂，養一隻馬每月六萬，養兩隻每月條幾，好環境時有生水入無所謂，唔係危言聳聽，若小動物再唔生性隨時被斬纜，睇嚟馬會都要有心理準備。
香港控制疫情好唔好見仁見智，馬會把關就百分百認真，所以一路運作都無問題。所謂一分錢一分貨，心水清嘅馬迷，或者都睇到過去長期好肯使錢嗰小部分，呢兩年入嘅貨明顯星光暗淡，原因一字咁簡單，有錢唔代表可以亂花，昔日使千萬買馬唔係無，上年至今十隻手指數得晒，過多兩個月，又到入紙抽馬時候，估計自購馬配額有關部門又要「跑數」，上年已經係咁，今年嚟緊入紙人數更加少，信不信由你。
文章
