Feb 8, 2023
原文連結在此 : https://hkanimalpost.com/2023/02/08/02082-3/
愛犬生老病死，往往為狗主帶來難以忘懷的痛。前財政司司長曾俊華日前在他的Facebook專頁中，寫了約800字文章懷念他剛於上周二（1月31日）離世的柴犬Oliver，Oliver和曾俊華一家共同生活了14年半，曾陪伴曾俊華一同構思財政預算案，曾經在官邸幫他「監視」在外面守候的記者，而成為新聞主角。他在文中坦言，直到現在仍不太接受到Olvier跑到彩虹橋的事實，估計需要一段時間才能走出傷痛。
不少狗主都視愛犬為子女，只是狗狗的生命比人類短得多，珍惜相處的每一天，讓別離不留遺憾。
曾俊華懷念Oliver原文：
「我心愛嘅寶貝Oliver:
自上周二你離開之後，雖然已經好幾天，但係你同我哋一齊生活咗十四年半，如今我哋仍然唔係好接受到你已經跑到彩虹橋嘅事實。
本來你有番咁上下年紀，以人類歲數計算，你已經係多過一百歲，我哋一直都有要面對同你講再見嘅心理準備，但係你離開得突然，我哋嘅心情到依家都仍然未能夠平伏。
仲記得喺2008年你嚟到我哋屋企嘅時候，只得幾個月大，真係可愛到不得了，望住你，就已經覺得好開心。當時我仲係財政司司長，住喺南區嘅官邸，有無限精力嘅你，最愛喺屋外嘅草地跑跑跑，時而走上旁邊嘅小山坡，四處探索，最喜歡跟我哋玩拋波波，即使我將你最愛嘅網球拋得高高，你總係能夠一躍而起將波叼住，身手非凡。
你係一隻好黏人嘅狗仔，好鍾意人氣，我哋喺屋企嗰陣，你總係鍾意留喺我哋身邊。記得以前每年呢個時候，我都係忙於寫財政預算案，我特別喜歡走到屋外嘅空曠地方寫嘢，思考下一份預算案嘅佈局，感覺頭腦會清醒一啲。喺呢個時節，有時喺官邸戶外地方都幾凍下，但你總係鍾意跟我走出屋外，陪住我做呢個艱巨任務，真係好窩心。
如果好似Andy Warhol話齋，everyone will be world-famous for 15 minutes，其實你都曾經有過令自己成名嘅15分鐘。記得喺2017年我宣布辭去財政司司長一職之後，因為未完成任免程序，未能向外公布參選消息，大批傳媒朋友就嚟到官邸外守候，觀察我嘅一舉一動。嗰日我留咗喺屋入面冇出嚟，但係你見到外面咁墟冚，全日就喺官邸四處走嚟走去，監視外面嘅情況，結果，你取代咗我成為當曰新聞嘅主角，媒體出現你大量照片，真係非常有趣。
早年喺Boston居住嘅時候，我哋都曾經養過兩隻鬆獅犬Cheshire 同 Cherry，佢哋可以話陪住我一對仔女長大。毛茸茸嘅Cheshire可以話係區內嘅小霸王，佢一走出前院，附近嘅狗狗都會敬而遠之，唔敢越雷池半步，當年佢哋離開，我哋都要一段時間先至走出傷痛。今次，我哋都需要一啲時間。
多謝你留比我哋咁多美好嘅回憶，你成日都對住我哋笑，你曾經為我哋一家人帶嚟無限嘅歡樂，你永遠都係我哋最心愛嘅小朋友，Oliver，we miss you。
愛你的公公」
文章
