Ming Pao Daily News A10 港聞 |512 Character(s) |2022-03-28
前離島區議員梁國豪噚日喺 facebook表示，有街坊發現喺長洲專門賣糯米糍嘅「長洲平記」設時租狗仔服務。由梁嘅fb
相片可見，店外一隻狗仔被放喺紙皮箱內，個箱寫上「狗仔時租 50/ 時 免按金」。 Emily以顧客身分致電平記，職員強調無提供出租狗仔服務，話只係將狗仔放喺店外「畀人睇」。
前區議員：事主聯絡稱知錯
梁國豪向Emily表示，有街坊噚日經過長洲平記，發現店舖涉出租狗仔，之後再有街坊喺下晝5點幾經過時，店舖已收起狗仔同紙箱，店員則向街坊聲稱狗仔只係畀遊人影相「打卡」。梁質疑，該店只喺被指摘後改口話無提供租狗服務，批評此舉唔尊重生命。至晚上梁國豪喺 facebook表示，事主已聯絡佢表示知錯有悔意，「承諾一定唔會虐畜」。
《公眾衛生（動物及禽鳥）（售賣及繁育）規例》禁止任何人無牌經營動物售賣商業務，大律師蘇俊文話，該法例只係規管動物買賣，有關店舖如出租寵物，不受規管。動保組織「毛孩守護者」創辦人陸家捷就話，雖然出租寵物無違法，但認為有違道德，批評唔應該利用寵物賺錢。佢又話，責任上租狗嘅顧客並唔認識該動物，未必能夠保障其安全，促請政府立法規管出租寵物業務。
文章
