學界動物對決 烏龜又贏兔

《蘋果日報》，2011/12/6

政治圈嘅動物惡鬥概念，竟然蔓延至教育界。屯門一間中學近日出現龜追兔仔咬嘅「慘劇」，搞到學校急急送走兔仔，烏龜取得最後勝利，霸晒成個大兔籠。原來龜兔賽跑外嘅龜兔惡鬥，表面上慢吞吞嘅烏龜始終都係大贏家，會唔會畀民望墮後嘅龍豬有啲新嘅啟示呢？

愛護動物協會接投訴

屯門馬錦明慈善基金馬可賓紀念中學上星期六開放日，吸引幾百人參觀；有愛心爆棚嘅市民見到校內一個只有百幾呎嘅兔籠內，九龜兩兔共處一室，加上嗰日氣溫急跌至攝氏 13度，搞到兔仔要同大龜爭暖屋，於是將兔仔慘況放上高登，叫巴打們打救小兔，又鬧學校虐兔。

原來呢幾隻惡龜大有來頭。兩隻盾臂龜中，其中一隻係漁護署搜獲後轉贈嘅走私龜，另有五隻巴西龜同兩隻印度星龜，明顯龜喺兔籠佔上風。學校總務組主管袁遠峰同八方解釋，呢兩隻三個月大嘅迷你荷蘭兔係一男一女，由校方好友送贈；兔妹妹諗住同龜先生玩，玩玩吓先俾龜先生咬甩佢啲毛。袁遠峰話學校定期洗兔籠，又帶兔仔睇醫生，照顧上冇問題。

市民唔係咁諗喎，至少愛護動物協會至今收到兩宗相關投訴，發言人話會方噚日搵埋動物督察去探兔仔，話兩種動物唔應該一齊養，要求分開。兔友協會委員會成員周玉霞都話啲兔仔係寵物兔，學校放佢哋喺石屎地生活，手腳會好痛，加上同龜一齊住，根本唔適應，而兔仔平日只係食合成兔糧，冇乾草畀兔仔磨牙，啲兔仔隨時因為牙太長而插穿嘴，好鬼陰功囉。

學校受到輿論壓力後，終於喺噚日將兩隻兔仔送番畀主人，希望兩隻兔仔喺嗰度生活好啲。至於以後，當然係唔會敢再養兔仔啦。