花園街尋親

《爽報》，2011/12/7

噚日係花園街大火後嘅頭七，排檔商販重返傷心地做法事，但係樓上嘅唐樓住宅仍然未解封，受災嘅居民就仲未知幾時返得上屋企。災民嘅慘處，唔單止係有家歸不得，佢哋仲有一班「親友」，可能已葬身火海，成功逃生的都不知所蹤。

住喺花園街192號唐樓嘅家貓小黑咪同B BU，喺大火之後一直失蹤，主人錢小姐話，當時佢男友逃生嘅時候想帶埋一對貓走，但係貓唔跟人，倉亡之間帶唔走佢哋。但係錢小姐依然對愛貓嘅生存抱住希望，連日來喺花園街貼街招，又向駐守現場嘅警察查詢，希望佢哋幫手留意下。

錢小姐終於喺噚日搵番其中一隻貓，十歲嘅小黑咪出現喺花園街後巷嘅簷篷上面。一個禮拜無家可歸，錢小姐形容小黑咪又殘又攰，貓毛脫落，即刻帶佢去睇醫生，好彩獸醫話佢冇大礙。

現場未解封 無得搵

不過同屋嘅另一位一歲小朋友B BU就生死未卜，錢小姐話，政府部門似乎唔多理解居民同寵物之間嘅深厚感情，咁多日來都冇積極幫過手。佢哋住嘅唐樓好多劏房，唔少人都養咗貓狗，喺咁細嘅窩居裏面一同生活，情誼比起任何主人同寵物都要深厚，相信今次大火之後，好多貓狗都走失咗，甚至罹難。

搵過漁護署，又搵過愛護動物協會，結果都一樣，現場未解封，幫唔到手。錢小姐希望喺調查蒐證嘅時候，係咪可以順便留意一下，有冇發現生還動物或者動物屍體？

B BU小資料
性別:男
年齡:約一歲
毛色:全身白色為主，右眼、背部和尾巴有豹紋、紅鼻子
特徵:活潑好動、怕人
失蹤地點:花園街192號
生死皆尋 薄酬