Ming Pao Daily News A09 港聞 |488 Character(s) |2023-05-23
專門收留流浪同受傷毛孩嘅粉嶺狗場「傻媽流浪貓狗之家」，上年業主因家族土地糾紛，場內近百隻狗要搬走，好彩得到有心人幫手搵到上水恐龍坑嘅「新居」，噚日就有45隻毛孩新居入伙。上年已經幫助傻媽嘅立法會議員劉國勳噚日喺facebook 出post 話，見證一年嘅搬遷過程好感動，透露下周會有另一批毛孩搬入約3萬平方呎嘅新居。
劉國勳話上年差唔多呢個時間收到傻媽求助，一班毛孩要喺兩個月內遷出，好彩喺限期前得到恒基地產借地。佢話經過多個月改劃土地、地盤平整、測量、整排水渠、上蓋牌照等程序，註冊小型工程承建商簽署人協會嘅工程團隊亦有支援，終於可以安置好毛孩，力保佢哋唔使再流浪。
劉國勳又話希望新居可以搞多啲親子同教學活動，令人關注流派貓狗問題。不過，佢話傻媽雖然得到自己喺土地政策同規劃等申請上嘅協助，亦得到有心人支持，但涉及嘅時間同金錢對一啲團體嚟講有一定壓力，希望政府發展北部都會區時，做好照顧動物嘅規劃同藍圖，包括主動提供土地同基本配套，並對有心嘅動物團體增加支援等。
文章
