動物地球要告長毛虐豬

《蘋果日報》，2012/3/6

上星期小圈子選舉提名期最後一日，長毛帶埋豬仔、龜仔去選舉事務處示威，隻豬仔可能未試過有咁多人圍住自己，即場嚇到瀨尿，畀記者影晒。動物地球總幹事黃繼仁睇到眼火爆，話呢幾日就會去報警，告長毛虐畜，因為佢不必要地令動物受苦或驚嚇：「明顯係虐畜，你要示威搵隻假嘅都得啦，做乜要隻真豬仔？」

黃生話，豬仔其實好聰明，智商同狗仔差唔多，行為亦好相似，兩者都唔會無緣無故瀨尿，據聞當日阿牛曾建成仲曾經大聲喝過豬仔，唔瀨就假。社民連濟弱扶傾，但又無視最弱勢嘅小動物權益，好似又爭唔落喎。