毒殺動物難蒐證緝兇 周一嶽：貓狗唔識落口供

《明報》，2012/3/10

近年不時傳出有人蓄意毒殺貓狗，但一直捉唔到變態兇手，食物及衛生局長周一嶽噚日喺立法會財委會，畀議員追問有咩方法，周局長好認真咁話，佢哋好關注事件，但蒐證的確有好多困難， 「因為動物唔識講嘢，唔能夠落口供！」

可能好多人聽到周局長呢個答案，真係唔知好嬲定好笑，但其實佢答議員時態度一啲都唔輕佻，佢仲補充話，調查時，只能靠主人畀證據，但係啲貓狗鍾意周街聞聞又試食，食嗰時，真係唔知邊個留低啲食物。

跨部門組織調查

漁護署長黃志光話，𠵱家已經有一個由警方同漁護署等部門組成的跨部門小組調查呢類案件，署方早前邀請專家為警方培訓，教佢哋點喺技術以及罪案現場調查做鑑證；1 月又搵咗愛護動物組織交流，呼籲一有發現，盡快報料，等跨部門小組可以追蹤罪犯，尤其是毒殺個案，相信係對貓狗有仇恨嘅人下毒手。