張寶華敗犬輸官司

《蘋果日報》，2011/7/6

由做新聞轉型搞娛樂嘅張寶華，早前搞變身真人騷《小敗犬．大作戰》，原來佢亦真人經歷「敗犬官司」，要賠律師費兼堂費 3萬幾蚊畀港鐵。

張寶華養有愛犬張錢錢多年，視如己出，幾年前搬到港島東區某港鐵管理屋苑，呢個屋苑禁止養寵物，有鄰居見到錢錢出入，向港鐵投訴，港鐵發信畀張寶華，禁止錢錢踏足屋苑。張寶華為留愛犬在身邊，力爭到底，不惜同港鐵打官司，結果張寶華輸咗，港鐵成功發出禁制令。

家陣無奈人狗分離，張寶華話自己先係苦主：「錢錢根本冇滋擾任何人，我唔明白點解港鐵要咁做。」佢話為咗挑戰港鐵，曾在屋苑點算有幾多住客養寵物，親自上庭陳詞，質疑港鐵玩針對；又嘗試在公契中捉字蝨，但都係無功而還，惟有將愛犬送到父母家。「我o依家終於知道母子分離嘅感覺，日日牽腸掛肚。」