寵物公園大漏洞 遛狗易走失

《東方日報》，2014/6/7

寵物公園設計不當，狗狗隨時走失！剛於今年落成的中西區海濱長廊（中環段） 寵物公園開放後，有狗主發現多處設計失誤，包括閘口離地過高、骨牌式圍牆的罅隙亦過闊，令狗隻隨時有「捐罅」走失危機，狗主雖向康文署反映卻未獲正視。立法會議員批評康文署設計草率，要求就市民所提議作出改善。

位於金鐘的中西區海濱長廊（中環段）寵物公園於今年一月底落成啟用，原為附近居民增添一個與愛犬玩樂空間，惟狗主卻劣評如潮。「啲圍牆係骨牌式設計，牆與牆之間啲罅好闊，狗仔好奇心好重，隨時會飆出去，已經見過一隻迷你都柏文捐咗出去，差啲走失！」羅先生直指狗公園設計不善，易令狗隻走失，當中尤其細小狗隻為甚。

「康文署話好難跟進」

羅先生指不少狗主亦深有同感，寧前往別處遛狗，「嚟得寵物公園，都係想狗狗可以喺個大啲嘅地方自由活動吓，但依家就成日都提心吊膽，驚佢會走咗去。」羅曾向康文署反映問題，惜情況一直未見改善，「康文署話已經跟足個圖則做，暫時好難跟進，其實佢肯簡簡單單用鐵絲網封好啲罅，保障到狗仔安全，我哋啲狗主已經好滿足。」

記者曾作實地視察，發現閘門底部離地約五吋，羅先生的愛犬不消半分鐘已兩度閃身從罅隙跑出園外；至於骨牌式設計的圍牆，每塊骨牌之間有三吋乘三吋空隙，小狗可輕易越過。康樂及文化事務署發言人證實，曾接獲一宗市民就有關寵物公園設計問題提出意見，但未有接獲走失狗隻的投訴。發言人說，建築署擬定設計時已參考其他寵物公園運作經驗及使用者意見，制訂初步設計方案後，亦曾諮詢海濱事務委員會─—港島區海濱發展專責小組及中西區區議會意見。發言人承諾，將檢討實際情況及參考使用者意見，有需要時會作改善。

本報轉介始裝籬笆

不過，經本報向康文署轉介後，記者日前再次到訪，發現寵物公園閘門底部已加設膠籬笆，收窄與地面距離。「諮詢專責小組同區議會只不過係例行公事，設計寵物公園之前，應該參考多啲狗主同動物組織意見，收到市民意見亦好應該改善，唔係話跟足圖則做就冇問題！」立法會工務小組委員會委員陳克勤認為，事件反映康文署處事粗疏，要求及早檢討，免市民得物無所用，「我都有落過去，發現因為宣傳唔夠同設計問題，令到使用率一直偏低。」