野豬橫行 跨黨派質問漁護署

《東方日報》，2019/4/7

社會對野豬關注增加，事關野豬擾民情況日益嚴重，之前已有唔少議員獻計，但結果就鬧出笑話多過解決問題。雖然係咁，立法會議員對野豬嘅關注並冇減少，唔同黨派嘅議員最近都向環境局提交與野豬相關嘅書面問題，仲有政黨有成四名議員跟進添。漁農自然護理署署長梁肇輝唔知有冇答問題答到手軟呢？

立法會財務委員會將審議財政預算案，議員早前就趁機會就預算案及政府部門開支事宜提交書面問題，而喺提交畀環境局嘅一百九十條問題中，就一共有七條同野豬問題有關。

林健鋒憂野豬多過人

早前有議員喺立法會上問到，當局會否引入野豬天敵去減少野豬數目，其後區議會亦有人獻計，建議將野豬送去無人島。曾經有兩名議員喺立法會跟進過野豬問題嘅經民聯，今次就有四名議員就野豬事宜向當局提交書面問題，四人包括曾喺立法會就野豬問題發言嘅林健鋒（Jeffrey）、工程界盧偉國同入黨只有幾個月嘅工業界吳永嘉（Jimmy）。

Jeffrey話，野豬問題太嚴重，政府嘅應對方法又成效不彰，過去兩年野豬繁殖速度快到離晒大譜，再唔處理嘅話，野豬數目分分鐘多過人，加上近期不時有野豬襲擊事件，政府應該要立即處理。 而Jimmy就話，黨友咁關心野豬問題，所以都要支持吓，而且佢都覺得野豬問題嚴重咗喎。

高佬賢嘆損農友生計

關心野豬問題嘅立法會議員仲有漁農界何俊賢（高佬賢）同何君堯等。何君堯本身係村代表，可能鄉郊多野豬，關心野豬問題都唔奇。至於高佬賢，過去都曾經提過野豬破壞農作物。佢大嘆野豬活動範圍有擴張趨勢，連以往冇野豬蹤影嘅地方都開始有投訴，唔少農友生計都受到影響。佢認為，野豬近年走到市區覓食，造成衞生問題，亦因而多咗同市民摩擦，唔少議員都收到投訴，自然多議員關心同提問。

根據漁護署回覆，過去三年野豬投訴及傷人報告數目確有上升趨勢，二○一六／一七及一七／一八年分別有六百多宗及七百多宗投訴，當中傷人個案分別有兩宗同四宗，但到一八／一九年，截至今年一月都已經有近八百二十宗投訴，仲有八宗傷人報告。而當局當管理野豬嘅開支亦由一四／一五年嘅一百多萬元，增至一八／一九年修訂預算為逾一千萬元，而一九／二○年預算更接近一千四百萬元。單看數據都反映野豬問題愈來愈嚴重，難怪議員都爭相關注喇。