學生體驗動物籠中苦

《蘋果日報》，2015/11/6

唔少動物繁殖場環境惡劣，貓狗喺狹窄空間淪為「貨物」，場主將佢哋出售圖利後又有另一批「貨物」入內受折磨。為向年輕一代灌輸「向寵物買賣說不」觀念，非牟利獸醫服務協會（NPV）主席麥志豪近月多次舉行教育工作坊，讓學生試入寵物籠，親身體驗繁殖場內動物之苦。

幻想與排泄物同瞓

八方早前到過余振強紀念第二中學直擊實況，其中Terry同Kobby走入籠內體驗動物喺養殖場嘅擠迫度，Terry話最初諗住與同學入去雙人道具籠「玩吓」，喺籠內曲腳而坐，「入到去就知道係好辛苦，入5分鐘就OK」，話好難想像啲動物點可以喺污穢不堪嘅籠中生存。
曾買過寵物嘅Kobby話，「入籠後幻想同排泄物一齊瞓嘅感覺，好惡劣同好辛苦」，慨嘆自己都係令寵物受苦嘅幫兇，「第一個感覺係覺得我自己好衰」。
NPV今年8月開始，喺幾間學校推行寵物籠體驗，日後更擬以唔同形式，讓市民了解更多動物之苦，例如帶參加者到野外，體驗流浪狗生活。