3腳貓麗麗站起來了 康復七成 市民爭領養

《明報》，2013/9/25

主流新聞有時真係有啲悶，Emily噚日就見到一個好令人振奮嘅消息，喺荃灣疑被狂徒斬斷右腳嘅小花貓麗麗，經過近一個月治療後，第一次站起來喇！治療麗麗嘅非牟利獸醫診所，執行主席麥志豪噚日喺facebook上載麗麗第一次企起身嘅片段，仲形容係「世紀一企」，話麗麗為公義、為生命站起來！ 麗麗站起來嘅片段即刻喺網上廣傳，網民無不叫好，讚麗麗「妳真係好叻女」，叫佢加油，要做「幸福小公主！」有網民就話，麗麗從瀕死中活下來，「感動得想哭」，要感謝上天同埋醫護人員及義工。網民仲話麗麗比好多人堅強！「奇蹟是需要自己引發的！」麥志豪公布消息後，幾個鐘頭內已經有逾3000人喺佢fb度like咗，留言打氣說話有300多段。

網民讚叻女 「感動得想哭」

麥志豪話，麗麗經歷大手術及療養後，估計目前已有七成康復狀態，麗麗今後應該適應到3隻腳嘅生活，仲相信麗麗唔會自卑，因為動物同人不同，唔會同隔籬嘅動物比較喎！不過，佢話麗麗受襲後，心理上看來仲有少少驚恐，需要時間去安撫情緒。

唔怕自卑 要時間安撫情緒

麥志豪話，市民嘅捐款已足夠應付5位數嘅治療費，而目前有好多人爭住要領養麗麗，佢哋正審核申請人，希望可以幫麗麗搵番戶好人家。