屋邨老鼠大如斗 橫行無忌通街走

《東方日報》，2015/4/5

古詩曰︰「官倉老鼠大如斗，見人開倉亦不走。」意思係老鼠偷食公糧，食到肥肥白白，見到人都唔驚。查實今日香港老鼠橫行，分分鐘仲惡過人，情況亦唔好得幾多嘅咋。

呢，有慈雲山慈樂邨街坊向本報投訴，指入夜後邨內垃圾站有大量老鼠出沒，仲要大模廝樣，橫行無忌，完全唔驚人。記者去現場睇過，發現十幾隻老鼠聯群結隊搵食，睇見都毛管戙。有地區人士踢爆，鼠患問題存在已久，加上近日有居民餵飼流浪狗，大量食物殘渣吸引鼠群，令問題更加惡化。

聽吓房署點解釋。佢哋話喎，已經開展連串滅鼠同防鼠行動，包括清洗邨內公眾地方同垃圾站；又話已經聯同其他部門展開聯合行動，捕獲多隻流浪狗喎。嗱，呢啲咪叫唔踢唔郁囉，官僚對居民嘅投訴闊佬懶理，等到傳媒跟進至急急補鑊，你話係咪好笑吖。

話時話，成個香港早就淪為老鼠樂園，又點止慈樂邨被老鼠攻陷吖。幾年前曾經試過有外國女遊客喺中環鬧市畀老鼠咬，嚇到花容失色，令香港臭名遠播。仲有吖，耗資八十億元興建嘅啟德郵輪碼頭，遊客就唔多嘞，反而吸引大批老鼠進駐，真係唔到你唔服。

唔使問阿貴，鼠患嚴重，絕對係食環署嘅責任。可能因為平時掛住蛇王啩，食環署防治蟲鼠組形同虛設，幾年前廣州鼠王來港獻技，一晚就捉到十幾隻，反而食環署出齊成隊人，幾粒鐘都冇收穫，簡直笑大人個口。

自己唔識滅鼠都算嘞，早前食環署居然禁止九龍城街市商戶養貓，搞到該區鼠患指數飆升，榮登全港十九區之首，真係打針都冇咁快見效，唔怪得有人將食環署改名為「護鼠署」喇。

正所謂，一污俱污，香港近年衞生環境愈來愈惡劣，蚊患、蝨患、蟻患樣樣齊，鼠患問題只係冰山一角咋。清潔香港運動搞咗幾十年，點解愈搞愈污糟？冇計喇，高官清潔當做騷，做完之後就關人個關，有乜法子唔烏煙瘴氣吖。當年沙士過後，港府係威係勢話要清除全城衞生黑點，點知得三分鐘熱度，依家衞生黑點仲多過以前，你話香港有乜法子唔淪為臭港吖。

咪話功夫茶唔提醒呀，家陣變種流感、禽流感、登革熱等多疫虎視眈眈，加上蟲鼠為患，如果港產官僚繼續放軟手腳，遲早爆大鑊嘅咋。當然喇，香港除咗鼠患，「人患」危害更加大，一場佔領之亂已經搞到香港雞毛鴨血，家陣有人仲成立所謂「港獨黨」，問你死未。鼠患人患為禍香江，唔通真係氣數已盡！