救海豚 向海洋公園說不

《爽報》，2012/8/24

香港不要海豚奴隸！嚟緊星期日，家長們可能諗住把握暑假最後時光，去海洋公園睇吓海豚表演。不過喺共敍天倫嘅同時，希望大家都認識一下生態保育嘅真諦。

關注動物權益群組將會喺後日（26日）發起「香港不要海豚奴隸」（圖）行動，當日下晝3至4點喺海洋公園門外集合，一齊穿上白色或藍色衣服，向園方示威。發起人話，訓練海豚、海獅同其他野生動物表演，仲要收錢娛樂人類，本來已經極為自私。海洋公園仲多次宣稱，動物表演可教育觀眾愛護海洋，但係表演除咗誘使海豚造出違反本性嘅行為，仲要佢哋跳上陸地畀人摸，呢類表演不但毫無教育意義，更向公眾灌輸錯誤嘅動物知識。