老鼠唔吼番薯叉燒 食署不力捱轟

《東方日報》，2019/5/31

食環署滅鼠不力，而深水埗區議會尋日鬧爆食環署用錯方法滅鼠，而與會嘅食環署官員就自爆已改用叉燒做餌，但成效都唔顯著，於是有增選委員建議用自助餐方式捉鼠。老實講，食環署署長劉利群之前話用新科技捉鼠，但都係「零戰績」，既然依家用番薯或叉燒作餌都唔見效，係咪真係用自助餐畀啲老鼠試菜呢？咁劉利群就要認真諗吓啲菜式，費事又係啲連老鼠都唔吼嘅食物，就嘥料兼嘥氣嘞！