《明報》，2021/11/20
漁護署捕捉及「人道毁滅」市區野豬嘅手法惹爭議，漁護署網站嘅「本港受保護的野生動物」欄目，前日被發現刪除咗「野豬」嘅資料，署方解釋野豬唔屬於「受保護野生動物」，網站資料有錯，所以要修正咁話。Emily發現，漁護署網頁同社交網站都有唔少同野豬有關嘅資料，包括漁護署6月時用野豬做咗批WhatsApp貼紙，用嚟宣傳生物多樣性，反應理想；上月萬聖節，漁護署亦搵咗野豬、蝙蝠同穿山甲等野生動物扮演漁護署嘅吉祥物B仔，造型可愛。
承諾唔餵野豬送豬仔禮物
漁護署為咗鼓勵市民唔好餵野豬，今年6月發帖，只要網民like咗「B仔自然教室」專頁，同埋留言「我承諾唔餵野豬」，就可獲贈限量嘅野豬環保福袋，裏面有印咗野豬公仔嘅環保袋同餐盒，結果呢個帖吸引到700個like。
Emily向漁護署查詢，同野豬有關嘅宣傳品同資料會唔會被消失，漁護署噚晚回覆，話會繼續以不同方式推行宣傳教育工作，增加公眾對香港自然環境及動植物種嘅認識。
文章
