車場狗轆斷腳 堅強活下來

《蘋果日報》，2016/3/29

早前遭貨車撞至重傷的「吐血狗狗」，震驚寵物界，狗狗經搶救後撿回性命；惟事隔一星期，再有唐狗被大貨車輾斷腳，現時在愛協接受治療。「真係唔忍心放棄佢！」目擊血淋淋一幕的羅太表示，受重傷唐狗叫「妹妹」，屬無晶片及無主人的「車場狗」，每日在滾滾車輪下求生，她曾目睹不少可憐狗狗，被輾斃變「狗地氈」，揭示車場狗的悲慘生活。

「做做吓嘢突然見到妹妹趴咗喺我對面車底，先見到成地血，佢隻手係血肉模糊，冇咗腳掌同埋見骨。」發現「妹妹」受傷的羅太，在葵涌貨櫃碼頭一個停車場工作5年多，熟知場內的車場狗各據地盤，不幸出意外的「妹妹」，活躍於距其工作地點150米外的地方，「佢(妹妹)係專登拖行過嚟搵我求救，咁有求生意志，真係唔忍心放棄佢」。羅太憶述意外發生在上周一(21日)下午2時許，剛過了車場的繁忙時間，估計「妹妹」在車底休息時，遇大貨車壓住前肢，牠掙脫時扯斷前掌。

羅太即時聯絡愛協救狗：「當時（愛協）職員問係唔係流浪狗？話獸醫會考慮救番都冇人照顧呢啲因素去決定（是否治療），我話呢啲係車場狗，雖然冇主人，但我保證會領回『妹妹』，求愛協一定要全力救。」

愛護動物協會發言人指，涉事唐狗當晚已做緊急截肢手術，一度危殆，留院多天後精神轉好，能進食及站立，惟身體仍然虛弱，愛協會繼續監察情況。

「妹妹」斷腳事件道出車場狗的命運坎坷，羅太指「車場狗僅比流浪狗好少少」，場內近40隻唐狗中，只有約10隻由羅太及其他人士在場內築籠餵養，其餘近30隻狗都在場內流離浪蕩，「最危險係有時啲大車開好快，睇唔到就撞到變咗『狗地氈』（輾斃）」。羅太表示，最少見過4隻唐狗命喪輪下。

記者到過車場了解，其中一天正下着雨，發現場內有不少殘疾唐狗，有的走路一拐一趷、有的疑因生育過量而致生殖器外翻，有部份則睡在垃圾上、走過污水泥氹，最多的狗會睡在車底下。

「啲狗狗病咗係冇人會知！」羅太無奈地說車場太大，加上狗隻根本無主人，平日都會自由走動，她一個人難以照顧每一隻狗，雖然她一直有帶車場狗去絕育，以減少繁殖問題，現時僅餘3隻母狗還未絕育，但數量仍不斷增加，「可能大家眼中佢哋都只係流浪狗，但其實都係生命，呢批狗年紀大都未必適合被收養，只係希望可以幫到佢哋一路終老」。