2016年3月9日星期三

為動物申冤十年 IT港男堅持眾生平等

2016年03月05日
原文連結在此: http://nextplus.nextmedia.com/news/latest/20160305/362771

黃繼仁,四十九歲,動物保護界代表,二○○六年舉辦反虐殺動物遊行,創造五千人上街的歷史。十年間,他將香港的動保運動,提升至「捍衞動物權益」的層次,呼籲人由食物、衣著關注所有動物與人是平等,卻不時俾人話short short哋。


黃繼仁(中)無宗教信仰,卻有強烈信念,十年間他和一班戰友不斷為動物發聲,週日他上街反皮草,之前卻收到來信「提醒」,若他破壞毛皮展,會向他追討保安費。

十年前旺角有好多單虐貓案,我同老婆好㷫,做IT嘅我粗粗哋開個網頁叫人簽名抗議,再膽粗粗叫人上街為動物申冤,結果當日史無前例有五千人響應,過後我就諗:所謂動保,究竟係乜?

我鍾意咗貓狗好多年,十年前屋企有六隻貓,而家有十幾隻,同我啲白頭髮一樣有增無減。十年前我係食肉獸,最鍾意鋸扒和BBQ。直至○八年,我睇咗一套紀錄片,講動物變成食物之前,由被飼養到被谷肥再被生劏嘅殘殺過程,之後我再食唔落任何飛禽走獸,並且堅信一個事實:所有動物和人一樣,都係平等。

動保嘅出發點,唔係動物有幾可愛或者我哋有幾鍾意佢哋,而係建基於每一種動物,都等於一個普通人,一樣有中樞神經系統一樣有知覺,都會感受到乜嘢係痛苦。真正嘅動保,唔再係關注個別幾隻貓狗被虐,而係用行動抗議每一日喺地球發生緊嘅大屠殺。

【熱血】

既然人和動物生而平等,咁點解人要食又要著佢哋呢。講食,我知道無乜可能叫人從此唔食肉,但我會話,大家不如先睇吓動物變成食物嘅殘酷真相,睇完片之後再思考。

講著衫,雖然好多人覺得皮草已經out,但呢個行業涉及無數人嘅利益,正垂死掙扎。近日葉劉話,著皮草同食牛一樣,我覺得同佢講都嘥氣,反而我想問吓,皮草界會俾幾多選票佢呢吓?

好多人話,搞動保嘅人都好極端好麻煩,但我想反問,好多年前歐美國家嘅人,爭取黑人同白人平等、爭取女權投票,咪一樣俾人話黐線。爭取公義從來都係一條漫長而孤獨嘅路,如果香港動保發展條路有十公里長,由十年前我搞遊行到今日,只行了三公里,目前動保界大約只有五十個活躍人物、錢更加無乜,但我相信力量會愈來愈大,甚至我覺得,有朝一日會被政商權貴盯上。

我好尊敬大陸嘅動保人士,佢哋無得為自己講嘢,都幫動物出聲,成日衝出馬路攔截貨車救狗。雖然佢哋當中有人用錢買起貓狗嘅做法引起爭議,但大陸動保已凝聚一股維權力量,香港無得比。

強國實在有太多殘殺動物嘅下流卑鄙手段,例如:食狗肉、臘貓肉、吞熊膽,更加出口全球超過一半嘅皮草原材料。我唔鍾意大陸,因為有好多違反動物公義嘅事;我唔鍾意建制派,同樣因為佢哋踐踏緊公平制度。我哋搞動保嘅人,就係咁有立場、咁熱血。