原文連結在此: http://www.inmediahk.net/node/1042379
食完飯，照舊拖我隻唐狗仔落街散步。經過垃圾站，見到垃圾堆中有個背心膠袋，個膠袋口好似有d野郁郁下，我埋去望望，哦…原來又係一隻狗BB，應該出世冇耐，隻狗成身軟賴賴，流住兩行鼻涕，四隻腳都彎彎曲曲。肯定又係附近住家繁殖出來既次貨啦。呢個月都不知第幾隻？！
五年前，自從漁護署強行推出139B既修訂，向住家繁殖發牌之後，呢幾年來，喺垃圾站呀街邊呀見過無數咁多既貓狗比人掉出街。有d死左有d未死，有老狗有bb。我見隻狗b仲算有d精神，即管帶左去附近獸醫診所睇下，不過近年獸醫診所旺到好似街市一樣，佢地剩係打預防針都打唔切。稍為麻煩既症，好多獸醫都寧願你「拍」左隻動物算數。冇辦法啦，自從住家繁殖合法化以後，寵物既價錢平左幾乎一半，繁殖商又係網上賣哂廣告，買隻狗仔玩下係大潮流，已經好少人好似我咁老土去領養唐狗！
獸醫見到我隻狗b，第一句問：「你買之前冇睇清楚既咩？政府有教你地消費者要驗貨嘛！咁唔小心架！我寫張醫生紙你拎返去換啦！」我話「隻狗係執架！」醫生好愕然咁「下？」左一聲，然後好快咁建議我安樂死。「你想養細狗去街口樓上果間新開既迷你狗狗樂園啦！」
我一早預左係咁既結果，又忍唔住多口問：「其實隻狗係咩品種？」醫生：「嗯…貴婦溝松鼠掛，而家好興。不過唔緊要啦，呢d都係玩下姐，通常咁配法隻狗都好短命，咁兩三年又會興另一種啦，到時咪換囉。」
冇錯，漁護署發既繁殖牌真係好搞鬼，攞牌又唔使考試，而配種又冇限制，餐ABCD餐蛋腸蛋餐腸腿腸你鐘意點配搭都得。八哥溝芝娃娃又得，貴婦溝哥基又有。近年就有越配越細既趨勢，因為香港好多地方都限制養狗，好多人想偷雞養，果d「茶杯貴婦」「茶杯芝娃娃」就最受歡迎。住家繁殖睇錢份上，投其所好，為左吸引客人，有幾細隻就BREED到幾細隻。出世後基因出左問題，賣唔去咪掉囉，計左入成本啦！
我屋企以前住深水埗，其實法例未通過前，附近都有d地方偷偷摸摸進行私人住家繁殖既。有時見到人來搵寵物，佢地會半推半就話動物唔係賣架，係領養架。但幾年前開始，連我住既舊唐樓有一半單位以上變左做私人繁殖，以前本來係一樓一鳳既地方而家變左一樓一狗，而且係堂堂正正喺門口貼埋牌照號碼，貼哂靚相賣哂廣告。
我有投訴過隔離既住家繁殖，臭過樓下公廁，動物慘過住地獄，搞左半年，後來漁護署吊銷左佢個牌，罰左幾千元。點知冇幾耐場主又返泥同一地方又繁殖狗BB，原來佢求其搵個friend申請過另一個牌。車！原來牌照費不過幾千蚊，仲係無上限任發，手續簡單，一家人輪住申請，攞牌快過你釘牌。
我後來忍唔住要搬啦，搬到觀塘一座私人樓。點知住冇耐隔離又搬左個新鄰居來又係做住家繁殖，不過呢個就冇咁污煙瘴氣。我入去同佢搭下訕，場主如數家珍咁講佢既生意經，私繁點樣無本生利，一隻狗公四隻狗乸就攞個A牌，一年加埋八胎共五十隻狗BB，每隻賣1500已經75000，支出都係濕濕碎既下欄錢。POST上網一陣就清貨。佢已準備加多幾隻狗乸攞個B牌，發大來做！我問一隻狗公怎可能應付八隻狗乸呀？他指一指狗籠旁邊一大堆藥，我心都寒埋！望住呢班長期食「偉哥」既狗狗，又望望旁邊一班生仔機器，一時間都講唔出邊個慘d？！！
我問佢咁樣做唔違規咩？「漁護署邊有人手巡查呀？！全港幾千家住家繁殖。即使有人投訴，私人地方漁記又唔入得，要查又要預約，到時清下太平地咪得囉！我又想問……佢即刻話：「你問咁多做乜？你又想做私繁？」
我想落街靜靜，諗緊如果公司裁員，我係咪應該轉行做私繁。我拖住我隻唐狗仔落街，為免自招煩惱，我既walk dog路線會盡量避開垃圾站……
（以上故事，純屬常理推斷，雖尚未屬實，但不中亦不遠。五年後的情況若更差，實為香港動物的不幸！贊成139b 既人，醒下啦！）
文章
