P字頭警犬BB等你命名

《蘋果日報》，2016/5/25

警隊3月尾多咗幾位「生力軍」，唔使用槍炮，佢哋靠嗅覺聞名，講緊嘅係3隻史賓格犬BB。3隻警犬BB係三姊妹，受訓後就會負責爆炸品嘅搜索工作㗎嘞！

警隊喺fb上載三姊妹短片（圖），萌樣冧死網民。佢哋嘅媽媽、即6歲史賓格犬Bowie，都喺片中出過鏡，負責爆炸品搜索工作。三姊妹約喺8周後會離開母親，通常會喺寄養家庭住一年，經警隊評估體格後再接受8周訓練。原來唔同時期出世嘅警犬BB，會順序根據英文字母改名，而今次三姊妹屬P字頭。警隊喺fb話，若有提議歡迎本月27日或之前提出，會交警犬隊認真考慮，有網民建議叫Proud、Proof同Protect喎。