Headline Daily P14 港聞 |412 Character(s) |2021-12-29
「飛天貓」聽落有趣，但其實非常危險。愛協喺社交平台公開平日拯救飛天貓嘅驚險片段，包括貓貓爬到大廈外牆橫樑、冷氣槽等危險位置，一唔小心隨時會跌落街，需要愛協督察出動救佢哋，Kelly睇到都覺驚險。
愛協分享三宗拯救飛天貓嘅個案，其中一宗個案中，貓貓神奇地爬到大廈外嘅橫樑，望到都流哂冷汗。愛協督察唯有出動大長索，箍住貓貓，再將佢帶返安全地方。愛協動物拯救隊副主管安東尼話，估唔到點解貓貓會喺呢啲位出現，不過，好彩貓貓「夠定」好合作，望到大長索都冇亂避。
愛協都話截至今年十月，已經有一百六十六單飛天貓事故，當中近四分一嘅貓貓，喺愛協督察出手拯救前已唔好彩跌咗落街。安東尼再三叮囑各位貓奴，切記要做足措施，安裝貓網、鎖好門窗、塞住啲窿窿罅罅，先可以好好地保護主子！如果大家發現有貓貓，或者其他動物需要緊急協助，可致電愛協二十四小時動物拯救熱線搵救兵。
文章
