2016年12月9日星期五

虐狗多到不忍聞 民族劣根太醜陋

《東方日報》,2016/12/7

古人話︰寧為太平犬,不作亂離人,其實只係講啱一半。今時今日中國內地財大氣粗,表面好似好巴閉,弊在民族劣根性未改,仍然停留喺口腔期,以為「背脊向天皆可吃」,狗狗隨時畀人類劏咗嚟食都唔知咩事,你話幾冇陰功吖。

唔使講得遠,淨係一河之隔嘅深圳,就有大批售賣「狗羊煲」嘅食店。東網記者上去睇過,呢類食店當正招牌菜咁大事宣傳,而且晚晚大收旺場,座無虛設,師傅仲公然喺街度進行屠宰,真係睇見都眼冤。

講到內地食狗肉嘅野蠻行為,唔可以唔提一年一度嘅廣西玉林「狗肉節」。呢個所謂節日每年屠殺超過一萬隻狗狗,相關店舖成行成市,日日做到冇停手,儼然一條巨大產業鏈。最離譜嘅係,有嚟自包括香港嘅動物保護人士睇唔過眼出手拯救,當地政府竟然百般刁難,簡直離晒大譜。

真係諗極都唔明,好似古人咁食不果腹就話冇計啫,現代人豐衣足食,捱餓就冇嘞,血脂、血壓、血糖「三高」就有份,點解咁多嘢唔食,偏偏要食狗肉?可能有人會話,狗係人類好朋友只係西方觀念,唔適合中國嘅獨特「國情」。嗱,呢鋪講法要戒喇。義犬報恩救主人於水火,呢類民間傳說多到數都數唔晒。而相傳喺中日甲午戰爭時,「致遠號」被敵艦擊沉,管帶鄧世昌決定以身殉國,佢飼養嘅一隻名為「太陽」嘅狗狗陪同主人一齊壯烈犧牲,一人一狗嘅雕像,到依家仲矗立喺山東威海。咁忠心嘅夥伴,你話點忍心下毒手吖。

嗱,食狗已經無法接受,有啲人得閒無事虐狗為樂,更加令人髮指。早排內地網絡瘋傳一條上海老翁虐狗嘅短片,佢當時坐喺一隻狗拉嘅手推車上,小狗已經攰到癱喺地唔郁得,點知老翁一於少理,起勢用木棍毆打,途人好言相勸,老翁不但冇停手,仲以為自己好威。講真,好多虐待小動物嘅人本身都係弱勢群體,唔知係咪平時畀人恰得多,於是向貓貓狗狗發洩。魯迅先生諷刺中國人「強者憤怒,抽刀向更強者;弱者憤怒,抽刀向更弱者」,估唔到咁多年後都冇改變。

當然喇,內地同胞惡待動物嘅劣迹,絕對唔止咁簡單。家陣愈來愈流行養寵物,但因為當局無監無管,導致問題多多,棄養有之,過度繁殖有之,總之就亂象叢生。如果真係有投胎呢回事,啲狗狗下一世都係唔好投胎嚟中國咯。

始終都係嗰句,一個民族點樣對待動物,係呢個民族文明程度嘅指標。虐狗醜聞無日無之,想唔認「醜陋的中國人」都唔得!