驚愛犬被毒殺 梁青華出動口罩防範

《東方日報》，2018/4/9

近日香港各區都出現虐殺寵物嘅事件，一眾寵物主人除咗覺得憤怒之外，仲擔心自己嘅寵物會出事，就好似香港鐘表業總會前主席梁青華咁，每日早晚都會安排工人帶三隻狗出去散步，如果自己放假就一定會親自放狗，佢話狗始終都係為食嘅，行到邊聞到邊，咩都放入口，所以如果有人有意毒殺啲狗，都真係幾難預防啊，所以呢排可能要考慮吓幫啲狗戴番個口罩。

梁青華話已經訓練到啲狗唔吠人、唔咬人，加上同屋企附近嘅狗主都已經好熟落，所以平時放狗都唔需要綁狗帶，等啲狗可以自在啲周圍跑。佢又話其實唔鍾意動物唔緊要，但係「動物都有生命」，依家好多動物機構都願意收留寵物，實在冇必要殺死佢哋，所以贊成成立動物警察，相信可以加強阻嚇性，減少殺害動物嘅情況。

沈慧林養過自來雀

香港菁英會工商發展研究會副主席沈慧林都贊成要保護動物，特別係對於被遺棄嘅寵物，希望照顧到啲寵物自然離世。佢之所以有呢個諗法係源於初中時一次養雀仔嘅經歷，佢話當時屋企嚟咗兩隻自來雀，就順勢收留咗佢哋，但個鳥籠好多時都係打開嘅，兩隻雀日頭都會飛咗出去，到夜晚先返嚟，但養咗大半年左右，忽然有一日兩隻雀出咗去，但得一隻雀返，再過幾日連另一隻雀都冇再返嚟，令佢好擔心兩隻雀仔出咗意外，所以後嚟雖然冇再養寵物，但都仲係好關心動物福利。

香港青年聯會首席參事吳傑莊以前就養過一隻松鼠狗，但佢以前放狗嘅地方都比較乾淨，環境安全，所以冇擔心過隻狗會有乜嘢意外，而佢相信狗應該都有本能去分辨乜嘢食得、乜嘢唔食得，所以一直都好放心。不過，佢都有留意近日虐殺寵物嘅新聞，認為關於保護動物嘅法例已好耐冇修改過，可能要徵詢吓公眾意見，與時並進吓先得喇！