術前診斷剝3隻牙獸醫剝松鼠狗14隻牙被轟

《蘋果日報》，2012/6/16

有松鼠狗仔牙齒鬆動須剝牙，獸醫手術前診斷只剝3隻，最終卻一次過剝走14隻牙，事前卻沒任何知會。活潑小狗變「死狗」不肯進食，令主人心痛。

6歲松鼠狗 Lucky有兩隻臼齒鬆動，狗主岑小姐帶牠到到深水埗非牟利獸醫診所求診，「獸醫話最多剝三隻牙，我簽名同意做全身麻醉洗牙同剝牙，但係手術中途職員先打電話畀我，話可順便做埋絕育手術，多收380蚊」，她曾口頭同意，惟數分鐘後詢問家人意見即聯絡診所「不做」，「職員話已經開咗肚要縫番，最終收咗我180元開刀費，連埋剝牙收3,150蚊」。

疑不做絕育被報復

Lucky回家後精神委靡，「佢唔願食嘢，最初以為麻醉藥未過，點知檢查發現原來剝咗佢14隻牙，連狗餅都咬唔碎」。她查看診所發還牙齒，發現有數隻沒牙石，「仲有一兩隻崩咗，唔知係唔係洗牙洗爛咗，再剝咗去」，岑懷疑因她反口不做絕育手術遭報復。

非牟利獸醫服務協會執行主席麥志豪回應事件表示，必須麻醉狗隻後才可準確檢查壞牙，手術同意書已授權獸醫如洗牙時發現壞牙可拔走。他又稱診所鼓勵寵物絕育，「唔做手術，寵物易患睾丸癌或子宮頸癌，到時醫療費仲貴過絕育手術費」。

獸醫蕭嘉和表示，如護理不善狗隻會生牙石及蛀牙，「爛得緊要太鬆，洗牙時會甩」。另一獸醫黎昌生則指，如屬細狗，脫掉多隻牙齒不會影響進食，「細種狗本身牙力唔夠，唔用牙撕碎食物；佢哋就算冇牙都可以食較軟身嘅食物」。至於麻醉期間一併進行絕育手術則屬正常，「麻醉有機會令狗死亡，可以嘅話梗係一次過做晒」。惟他認為手術前應與狗主有充份溝通。