放生玩具龜諷競爭法 團體惹一場誤會

《明報》，2012/6/8

立法會正審議《競爭條例草案》，政府堅持豁免貿發局等多個法定機構，有團體發起今日去立法會門外，就政府放生公營機構抗議，仲聲言會搞一個「放生160 公營機構烏龜」行動，諷刺競爭法。不過，有動物團體好反對，批評呢個做法漠視動物生命，呢個團體嘅何民傑就澄清只係放生玩具龜。

動物團體以為係真龜

發起活動嘅係一個叫「踢走政府霸權聯盟」嘅組織，佢哋由獅子山學會、107 動力等組成，今日中午會喺立法會外抗議競爭法，話會帶同160 隻烏龜，貼上「從事經濟活動的法定團體」標誌去放。此舉引起動物團體不滿，呼籲一人一電話叫發起人收手咁話。

關注動物權益嘅民建聯陳克勤話，佢有向何民傑了解事件，對方解釋係一場誤會，話無諗住放生真烏龜，只係諗住用玩具龜，強調就算有真龜都只係問朋友借。佢仲向陳克勤呻，今次事件畀人打爆咗電話郵箱，絕無諗過事件會引起軒然大波。