導盲犬BB禁足公屋 克勤嬲豬

《蘋果日報》，2015/10/1

大台最近有套劇，再次令人關注導盲犬在港係咪享有「合理權益」。本身係愛狗之人嘅民建聯副主席陳克勤噚日帶同香港導盲犬服務中心主席張偉民及導盲犬使用者徐文俊，約見政府相關官員，席間談及導盲幼犬喺公共屋邨被拒絕進出都好氣憤。

盼政府酌情

張偉民話呀，由於導盲幼犬嘅數量嚟緊會越來越多，而且絕大部份視障人士都居住喺公屋，希望政府正視問題，給予酌情權，容許導盲幼犬喺公共屋邨出入；徐文俊則提出有人魚目混珠，帶非導盲犬進出食肆，為免影響市民對導盲犬嘅信任，希望漁護署喺導盲犬狗隻牌蓋印，可以方便真正有需要嘅視障人士進出食肆。

據知政府官員同意拍攝宣傳短片及製作宣傳品，教育港人認識導盲犬；對於陳克勤要求檢討有關導盲犬嘅法例，當局據說應承用一年時間觀察及因應情況而修改法例。