身長5毫米 細過指甲 迷你金蟾蜍 擅闖民宅

《蘋果日報》，2018/6/25

提起體形細小嘅青蛙，小記當然會諗起香港特有嘅盧文氏小樹蛙（Liuixalus romeri），有住喺大埔嘅讀者區小姐，上星期二（19日）夜晚喺屋企嘅花園，發現一隻體形非常細小嘅「青蛙」，「係個仔見到先，細到睇唔清楚」。

「細到隻蚊咁真係未見過」，區小姐係第一次見到咁細隻嘅「青蛙」，好奇之下就將佢帶咗返屋企，仲用個玻璃樽養住。區小姐連續兩晚觀察，隻「青蛙」一樣會彈彈跳，但係就唔會叫。區小姐度過，「青蛙」只有5毫米長，細過塊指甲，「係咪咩品種？」區小姐仲好有心機，將青苔同泥土放入樽，仲會噴濕啲泥，營造一個類似大自然嘅環境畀「青蛙」生活。

小記去咗區小姐屋企睇過，原來「青蛙」嘅頭係金色，身上仲有斑紋，因為連魚糧都大粒過佢。區小姐喺花園捉咗幾隻蟻放入玻璃樽，「青蛙」就開餐喇！雖然睇唔出佢嘅品種，但小記就覺得唔似盧文氏小樹蛙。

區小姐囝囝謙謙話，當日見到「青蛙」跳來跳去，「好得意，媽咪話係蜘蛛，我話係青蛙嚟嘅」。5歲嘅謙謙話，唔想佢變到太大隻，「大隻嘅話會嚇親我㗎」，仲話想搵多幾隻，等佢有多啲朋友。

無毒溫室蟾無蝌蚪期

小記將啲相畀咗蛙類專家劉惠寧睇過，原來區小姐同記者都擺咗烏龍，嗰隻其實唔係蛙，而係蟾蜍。劉惠寧話，呢隻係啱啱由卵孵化而成嘅「溫室蟾」，來自中美洲，屬於入侵品種，以食螞蟻為生，溫室蟾同一般嘅蟾蜍唔同，唔需要喺水中產卵，而且亦唔會經過蝌蚪期，繁殖力超強，劉惠寧話雖然溫室蟾無毒，但都唔建議市民將野生動物帶返屋企養。

另稿:
癩蛤蟆有毒腺　青蛙皮膚光滑

「青蛙思想保守，不思進取，坐井觀天，是負能量，而癩蛤蟆思想前衞，想吃天鵝肉有遠大目標，是正能量」。呢段文字曾經喺網上流傳，其實青蛙同俗稱「癩蛤蟆」嘅蟾蜍性格係咪有分別，真係天知曉，但係外觀就真係有好大唔同。

蟾蜍外形呈橢圓，背部顆粒凹凸不平，大部份耳後有毒腺，分泌經皮膚接觸嘅話對人體無害，不過如果誤當青蛙食落肚嘅話就可能中毒。蟾蜍脫落嘅皮膜即係中藥材蟾衣。

蟾蜍四肢粗短，前肢比較發達，有助爬行，雖然係陸地生活，但就要喺水中產卵，卵會喺水中發育成蝌蚪，不過今次周小姐搵到嘅溫室蟾就唔會經過蝌蚪期。

青蛙皮膚比較光滑同濕潤，俗稱田雞嘅虎皮蛙，就係青蛙嘅其中一個品種，青蛙四肢纖細，後肢較發達，擅於跳躍，動作較蟾蜍敏捷。而兩者都係兩棲動物，天敵同樣係蛇。