雪橇疑走失 搭港鐵尋親

《蘋果日報》，2018/6/27

天時暑熱，梗係盡量留喺有冷氣嘅地方，行完街直接搭車走，咁就最perfect喇！嗱！呢隻高大威猛嘅雪橇大哥就識嘆喇，行完街仲入埋閘想搭港鐵返屋企！

文先生前日黃昏6點去到港鐵南昌站，準備入閘搭港鐵，入到站內冇耐，就發現隻雪橇。由文先生提供嘅片段見到，雪橇喺度慢慢行，滋油淡定，「好似熟客咁，完全唔緊張㗎」。

乖乖跟職員離付費區

佢跟住喺雪橇後面行咗一段路，都唔見狗主出現，但隻狗嘅表現，似出巡多過走失喎，文先生話隻雪橇最終竟然行咗埋閘機，仲穿過闊閘機，你未拍卡入閘會俾港鐵罰5,000蚊㗎！

就咁睇，隻黑白色嘅雪橇毛色都幾靚，仲肥嘟嘟咁，一啲都唔似係流浪狗。而佢咁威猛巡視車站，其實已經引起咗港鐵職員嘅注意，「幾個職員圍住佢，叫乘客唔好行埋嚟，跟住引導佢行返出去」。葉先生形容雪橇十分聽話，隨即離開付費區，「圍觀嘅人都讚佢好乖喎」。

文先生話見到雪橇頸上面掛住噹噹，估計佢應該有人養，只係同主人走散咗，希望雪橇可以快啲同主人團聚。港鐵發言人回應話，當日6點左右，港鐵車站職員發現，有狗喺站內徘徊，職員將狗引離付費區，狗狗最終由A出口離開車站。