狗女踩腐液 爛掌險跛

《蘋果日報》，2018/6/7

西環有狗女疑踩中大灘腐液，四掌紅腫爛肉，真冇陰功。事發喺星期一（4日）中午12點幾，陳小姐拖住近12歲嘅約瑟爹利「朱古力」散步，經過堅尼地城新海旁一間食店外，附近燈柱旁有灘液體，朱古力踩咗落去，就搞到要睇獸醫。陳小姐話當時朱古力好唔妥：「佢（朱古力）好快左手抽起咗，趷下趷下，我以為佢抽筋定拉親，即刻抱起佢去附近朋友開嘅餐廳坐低，擺佢落凳佢都趷起，我就抱佢去睇獸醫。」

醫生發現朱古力四掌紅晒，左手最嚴重，要剃咗毛先用到消炎水抹傷口，棉花黐住好多啡色凝固物體。陳小姐話「聞到好濃烈、好似鹼水糭嘅鹼水味」，相信朱古力俾嗰灘不明腐液灼傷。

醫生就話，無論高濃度嘅鹼性或酸性液體都可灼傷皮膚，之後處方抗生素、藥膏、止痛消腫藥畀朱古力，相信過兩、三日會逐漸康復。不過，陳小姐好心痛，仲自責以為係灘水，冇即刻抱起朱古力。之後陳小姐朋友通知嗰間食店，職員否認潑過腐液出街，但都即時去沖洗地下。