幸福邨裏老鼠歡 貓兒非懶即係病

《東方日報》，2018/6/6

唔講大家可能唔知，鑽石山之所以得名，唔係因為盛產鑽石，而係因為嗰度前身係一個石礦場，個「鑽」字係作動詞用。同樣道理，長沙灣幸福邨嘅「幸福」，原來並唔係指班居民，而係喺邨內好食好住打橫行嘅老鼠，真係唔到你唔服﹗

唔係誇張o架。幸福邨街坊投訴鼠患問題，大大話話十幾年，情況唔單止冇改善，近排仲愈演愈烈，即使住到三十幾樓一樣無法幸免。鬼咩，房署滅鼠慢過蝸牛，淨係裝個老鼠擋都拖足半年；邨民向食環署求助，對方居然關人個關，將個波大腳傳畀外判清潔商。邨民無計可施下惟有食自己，有人用老鼠膠，一次過就捉到三隻大老鼠，有人斬腳趾避惡鼠，索性閂實晒廚房同廁所窗，都咪話唔閉翳。

冇計喇，房署同食環署係出咗名嘅大懶貓，佢哋滅鼠不力，點只幸福邨被老鼠攻陷，成個香港都淪為老鼠樂園，好似幸福邨呢啲舊屋邨，三日唔埋兩日就有老人家被老鼠咬傷；中環夠光鮮喇啩，幾年前一樣試過有外國遊客光天化日被老鼠咬傷，香港乜嘢架都丟清光。嗱，咪以為鼠患小事呀，歐洲中世紀黑死病死咗二千五百萬人，就係拜老鼠所賜；明朝開國皇帝朱元璋嘅父母、兄嫂，同埋元朝好幾個皇帝，都係死於鼠疫，認真唔講得笑。

講番港產官僚滅鼠表現，真係Hea到冇人有。食衞局局長陳肇始最近公布今年第一期全港滅鼠運動戰績，捉得嗰六千幾隻老鼠咁大把，除番開全港十八區，一日十隻手指數得晒，唔使問阿貴，梗係有人「蛇王」敷衍交數啦。可能政府自己都知衰啩，一直以來都只係話致力「維持」香港環境衞生，而唔係「改善」，唔怪得鼠患一直維持猖獗水平啦。正所謂針拮到肉先知痛，想班高官正視鼠患問題，怕且只有掟佢哋落幸福邨住番幾晚，享受一下同老鼠大被同眠嘅另類「幸福」滋味，睇吓佢哋仲會唔會懶懶閒！

話時話，房署同食環署縱容惡鼠擾民，只算係小懶貓，相比起警方同司法當局打黑不力，甚至充當黑勢力保護傘，只係小巫見大巫。大家有眼見，香港班治安惡鼠根本唔放執法部門呢啲懶貓、病貓在眼內，就算風頭火勢，依然恃住有警方同司法兩把保護傘罩住，照樣拉大隊出嚟搵食甚至開大片，警方同司法當局唔單止養鼠遺患，直頭係貓鼠一家親，市民想食餐安樂茶飯都難。

一句到尾，香港滅鼠唔掂，滅罪又唔合格，本來應該人住嘅香港，變咗蛇蟲鼠蟻嘅天堂，港府冇靈魂，冇神經，亂象肯定陸續有來！