肥鼠闖餐廳 草皮唞暑

《蘋果日報》，2018/6/21

天時暑熱，梗係留喺冷氣地方最爽，食飽瞓，瞓飽再食過，米奇就身體力行，親身示範喇。話說前日，住喺沙田禾輋邨嘅讀者阿敏，送完小朋友返學，就同朋友去禾輋商場二樓一間餐廳食早餐，坐咗冇耐，阿敏已經見到有隻老鼠喺地下閃過，但朋友話見唔到，兩個人就繼續食。點知呢個時候，米奇就再出現喇！

食客稱次次飲啡都肚痛

「好大隻，完全唔驚人咁！」5分鐘之後，阿敏就喺牆邊嘅假草皮裝飾上面，見到隻肥嘟嘟嘅老鼠，「即刻冇晒胃口，毛管戙」。過咗大約15分鐘，米奇都唔係點郁，之後米奇爬咗上牆，睇個款係嘆完冷氣準備閃！職員拎晒架生準備去捉佢，結果只可以拜拜佢條尾。

阿敏一星期幫襯三、四次，但朋友每次飲完咖啡都肚痛，「我仲講笑話佢啲咖啡好有效喎」。𠵱家阿敏話唔敢再去，「點知有冇老鼠尿流入食物，佢哋有冇咬過啲包」。

餐廳發言人就回覆話，事發當日已經安排洗潔同滅蟲公司進行全店消毒，公司亦向管理處了解，對方話近日都收到其他商戶反映有鼠患問題，將會加強公眾衞生嘅工作。