呢頭話考慮捕殺 漁署用野豬做揮春

《東方日報》，2019/1/25

近期野豬爭議鬧得沸沸揚揚，漁農自然護理署都玩噱頭，臨近新年推出野豬揮春，用野豬圖案代「豬」字，推出「『豬』事順利」同「『豬』年快樂」等揮春。不過，漁護署好似唔記得咗，近年野豬滋擾投訴數字直線上升，二○一八年首十月已經有高達六百七十宗投訴數字同五宗傷人，佢哋仲話如果啲豬極具攻擊性，仲要重新考慮人道毀滅添！呢頭話重新考慮殺野豬，嗰頭又用野豬嚟做揮春！？

事緣有區議員喺Facebook貼出收到漁護署豬年揮春，仲留言話剎那有啲感動喎。我哋都收到同樣嘅揮春，反轉後面，原來係漁護署教人遇到野豬可以點做。漁護署話見到野豬時應該將膠袋放入背囊之內；亦應該保持鎮定，同野豬保持距離；可以躲藏喺大樹或巨石之後。該署又提醒大家，唔好餵飼野生動物，又唔好接觸野豬，幼豬都唔好制，同時唔應該用物件驅趕野豬。

漁護署下個禮拜一會上立法會環境事務委員會交代野豬滋擾一事，唔知會唔會即場大派野豬揮春呢？