愛犬狂吠 提醒女主人逃生

《東方日報》，2017/12/4

愛犬猛吠又搲窗，提醒女主人火海逃生。田心新村火警發生於凌晨時分，事發時火勢蔓延迅速，大部分村民嗅到燒焦味及聽到爆炸聲即時驚醒，來不及收拾細軟便逃出屋外，到安全地方暫避，情況狼狽。一眾村民在球場靜候消息，又致電向親友報平安。

住在火場附近的一名西班牙女子指，事發時在寓所內練習打坐，尚未就寢：「突然見到狗仔在猛搲個窗，都唔知咩事，嘩！點知見到前面間屋燒緊咁大火，咪同屋企人帶埋隻狗走去球場避吓囉！」又指幸好有愛犬提醒，否則後果不堪設想。她指在上址居住逾一年，首次遇上火警。

一場無情火 菲漢盡失家當

另外，住在起火鐵皮屋的菲律賓男子Steven稱，他與妻子租住上址劏房約一年，事發時正在睡覺：「突然聽到好大『嘭、嘭』聲，起身就見到火燭，仲愈燒愈犀利，就即刻走出嚟啦。」對於家園被大火無情吞噬，Steven長嘆一聲，無助地指：「我間屋燒晒，咩都冇晒啦，都唔知之後點算好，唔知可以住邊。」說罷即默默地轉身離開。