大圍猴王 專獵紅白膠袋 強搶糧 抓傷童

《蘋果日報》，2019/1/10

大圍猴王出沒注意！住喺大圍美田邨嘅李先生，上周五下晝1點幾落街，喺香粉寮街同美田邨美致樓對開交界、停車場閘口前嘅過路處，睇到一幕「猴王獵食記」，猴王強搶婦孺拎住嘅膠袋，仲撲上個小朋友度抓傷咗佢，然後即席開餐。

李先生話隻馬騮威猛、唔驚人，大阿哥咁款，特別大隻，仲話性徵好有睇頭喎。李先生話，初時猴王喺香粉寮街美田商場對面馬路摷垃圾桶，然後坐喺馬路欄杆開始獵食，佢離遠見到有人揸住白色或者紅色膠袋，就連跑兩條行車線直衝埋去行人路，李先生：「見佢連續三、四次衝過對面線搶嘢食，喺轉角位坐低食嘢，食完又返過對面馬路，再捕下一個人！」

搶完坐低嘆

李先生影到其中一條片段，猴王搶個女人嘅白色膠袋，內有嘢食，個女人急急腳走人。之後另一個女人帶住一個六、七歲小朋友，同猴王迎面相遇，馬騮見小朋友拎住袋嘢食，即時撲上，仲抓傷佢額頭。小朋友當場嚇到喊，佢媽咪好緊張攬住佢檢查傷勢，猴王就繼續坐喺原地食嘢。

搶完幾個人嘅嘢食，可能猴王飽得滯，爬番上樹，地下仲有幾個叉燒包未食。李先生話區內一向都有馬騮出沒，最誇張應該係舊年年頭，超過50隻馬騮衝落美田邨，有馬騮爬上低層單位攞嘢食。李先生初時冇諗過要報警，但冇諗到猴王會整傷小朋友，嗰對母子好快就走咗，佢都愛莫能助。