愛貓又禁貓 高永文捱批

《東方日報》，2015/6/18

人氣明星貓忌廉哥甚受市民歡迎，連食物及環境衞生局局長高永文都曾經同佢合照籌款，仲話自己係愛貓之人，收養過好多流浪貓云云。立法會議員陳志全（慢必）尋日就狠批，食環署近日喺街市「滅貓」，雖然高永文同忌廉哥影相，但公眾就覺得政府對動物根本唔友善囉！

議員憂街市貓遭人道毀滅

慢必話，九龍城街市周圍都係老鼠，但街市管理組就貼出「禁貓令」，唔准租戶養貓，否則會被捕貓籠捉走，慢必好擔心啲貓咪會被人道毀滅。

高永文話，任何措施都有好有壞，食環署既要考慮貓隻可以控制鼠患之餘，又要擔心會否造成其他問題，例如有租戶投訴。當局會因應街市嘅需要同鼠患嚴重程度，再研究係咪需要檢討政策。至於被捉嘅貓有冇被人道毀滅，高永文就話，漁護署捕捉嘅流浪動物都有地方寄住，如果貓隻健康唔好或無人領養，先會被人道毀滅。