2018年12月24日星期一

橫洲小組臨收檔開公聽會 朱凱廸拉動物落水

《東方日報》,2018/12/22

立法會橫洲發展項目事宜小組委員會(橫洲小組)早前因為建制派議員甩轆唔齊人,令民主派議員朱凱廸偷雞做到主席。雖然橫洲小組工作明年二月底就結束,但朱就決定喺明年二月一日召開公聽會,而主題就係點樣處理受項目影響嘅動物。多名本身為橫洲小組成員嘅建制派議員就批評朱濫用主席權力,質疑朱得唔到橫洲村民支持,就連啲貓狗都拎埋出嚟講,不滿朱玩嘢,要成個橫洲小組嘅成員陪佢一齊罰坐。

橫洲小組工作時間仲有兩個多月,明年二月二十七日小組就會結束,建制派本來可以鬆一口氣,不過朱凱廸就發出指示,小組將會喺二月一日召開公聽會,去處理「受橫洲發展項目影響的動物的安排及相關政策事宜」,仲要開足三個鐘會。立法會就橫洲事宜早已舉行多次公聽會,根據立法會網頁紀錄,立法會房屋事務委員會同發展事務委員會就曾先後三次聯合舉行有關橫洲發展嘅公聽會,首場喺前年十一月二十九日,受影響嘅橫洲三村村民都有出席;之後兩場就分別喺今年六月二十六日同二十九日,呢兩場公聽會就為咗聽取村民對政府推出特惠補償方案嘅意見。

梁志祥:濫用主席權力玩嘢

有關橫洲嘅公聽會主題由受影響嘅村民到受影響嘅動物,本身係橫洲小組成員嘅建制派議員梁志祥就批評朱浪費時間,指寵物會跟隨村民搬離,流浪貓狗已經有一貫法例同程序去處理,質疑朱依家得唔到村民支持,就「連啲貓狗都拎埋出嚟講」,擺明係濫用主席權力玩嘢,要成個小組陪朱罰坐。

另一小組成員、批發及零售界議員邵家輝亦指,橫洲小組成立目的係要處理橫洲地皮公屋數目同發展時間表,以及同各方持份者溝通,反問︰「關啲動物咩事呢?」認為保護動物課題應該留番喺合適嘅場合討論,建議朱將主席嘅權力用喺合適嘅地方。

朱:明年將視察露天貨倉地

朱回覆查詢時話,佢唔止開公聽會,亦會喺明年二月底安排小組視察橫洲第二、三期嘅露天貨倉地,並會帶領小組追殺政府,要政府提交房屋署官員進行非正式溝通時嘅防止利益衝突守則。咁搞法,喺小組結束前,建制派都有排去應付朱嘅要求。其實搞成依家嘅局面,全因上月底橫洲小組開會選主席時,建制派「佛系」懶懶閒唔齊人,搞到要抽籤選主席,終令朱登上主席之位,所以建制派今次都算係自己攞嚟衰喇。