祥華邨巨鼠開P 嚇親女街坊

《蘋果日報》，2018/12/4

彭小姐上月24號凌晨1點，喺粉嶺祥華邨祥智樓正門對開公園放狗，點知見到老鼠開party，幾隻老鼠（箭嘴示）跑嚟跑去你追我逐，最大嗰隻有女士前臂咁長，嚇到彭小姐尖叫。

除咗前門公園，其實後門垃圾房同埋屋邨垃圾站都好容易見到鼠蹤，彭小姐話喺佢視線範圍內同一時間見過大約8隻，主要都係深夜時分，但因為環境昏暗，加上老鼠又跑得快，所以好難影。

喺祥華邨住咗廿幾年嘅彭小姐話，邨內鼠患係近一年越嚟越嚴重，以前垃圾房有養貓，但係貓咪俾人捉去絕育之後冇下一代，當垃圾房冇貓之後就冇嘢治到老鼠，加上之前打風吹冧晒啲樹，老鼠洞冇晒，搞到啲老鼠走晒出嚟。

彭小姐最擔心係衞生問題，公園啲凳或者花叢壆邊都有老鼠嘅足迹，好多老人家會喺公園坐，小朋友又會喺度玩，擔心會感染病毒。大約一、兩個月前，彭小姐曾經向管理處同區議員反映過，但都好似冇人正視，區議員話已經喺水渠位加咗鐵絲網，但佢認為作用不大，準備再向房署投訴。