2018年12月21日星期五

口吐白沫亡 長洲五狗疑遭毒殺

《蘋果日報》,2018/12/20

長洲又有懷疑毒狗事件,點解要加害無辜嘅動物呢?噚日朝早9點幾,有人發現長洲五隻流浪狗伏屍喺東堤新村同北帝廟附近,有啲狗甚至嘔白泡,眼角滲血,死狀悽慘。警察接報到場調查,將案暫列殘酷對待動物,暫時未拉到人。狗隻屍體之後由愛護動物協會人員帶走檢驗。

有網民將長洲「屍橫遍野」嘅狗屍相擺上網,形容「一晚之間整個山頭全部狗隻無端死晒……四處狗屍,保守估計成個山頭無一倖免」。據講,長洲東灣石灘同北帝廟一帶平日都有好多流浪狗流連,唔知係唔係近日狗吠聲越嚟越嚴重,滋擾到人惹起不滿,懷疑有人喺流浪狗出沒嘅地方偷偷地擺低「綠色啫喱」毒殺狗隻。消息話嗰啲「綠色啫喱」好可能係老鼠藥,狗唔小心食咗之後會喪失凝血功能而內出血致死。