持高球棍狂毆被綁狗仔 虐犬男被捕 網民叫好

《蘋果日報》，2018/12/20

「陰功，『旺仔』好乖㗎！」究竟係乜嘢驅使一個送貨工人咁狠毒，用高爾夫球棍毆打一隻狗仔？噚日凌晨零時，38歲姓卓女途人行過旺角長旺道聽到狗吠聲，發現一個男人用高爾夫球棍打狗，於是報警。警察到場見到隻狗個嘴流血，翻查附近CCTV片段，見到男人棍棍有力，最少打咗五、六嘢，終於噚日中午喺旺角區拉咗一個52歲本地男子，涉嫌殘酷對待動物，消息一出網民一致叫好。

慘被亂棍虐打嘅黑色唐狗旺仔兩歲大，佢80歲主人張婆婆噚日眼濕濕話，旺仔喺愛協獸醫診所觀察緊。張婆婆喺長旺道地舖經營海味雜貨已經半世紀，約兩年前旺仔初生時就開始養佢，有晶片，佢話平日收舖後旺仔唔肯入舖，所以一直用鐵鏈將佢綁喺舖外一張木枱，夜晚佢鍾意跳上枱面瞓覺。

主人話從來唔咬人

翻睇「香港動物報」上載fb嘅CCTV片段，當時旺仔瞓喺枱面休息，一個男人突然撲出用支高球棍狂扑旺仔。旺仔嚇到彈起身，匿落枱底，個男人繼續追打，大力到球棍都甩手。個男人捐入枱底執返支球棍繼續打狗，連檔口啲雜物都畀佢掃毀。最後懷疑旺仔咬住支球棍，雙方拉扯一輪爭持不下，個男人先至離開。據知，報案人一度追住個男人，但最終畀佢走甩。現場留低一灘血，旺仔就眼有淚光！

張婆婆話旺仔從來唔咬人，但有一個特點，「見啲道友精神唔夠、樣衰衰會吠佢！」佢話警方拉嗰個疑犯，係附近長旺商場一間凍肉舖嘅送貨工人，佢曾經同張婆婆投訴：「你隻狗成日吠我！」之後對方買叉燒、燒鴨餵旺仔食，張婆婆仲以為佢想同旺仔打好關係，點知竟然打佢！早兩日張婆婆仲聽到嗰個男人「警告」旺仔：「你因住嚟呀！」諗唔到就發生虐狗事件。張婆婆話等旺仔好番，會帶佢返屋企過夜。