抱狗舊相遭圍剿 網民鬧陳肇始大話精

《東方日報》，2019/3/18

到底政府有幾重視動物權益？就因為早前一隻泰國小狗疑誤乘貨櫃船抵港，被漁護署迅速人道毁滅，再次惹起極大爭議，唔少網民更翻食物及衞生局局長陳肇始嘅舊帳，喺網上圍剿佢，不但大罵政府草菅狗命，仲鬧佢係大話精。

當時仲附加「虐待動物可恥」

翻乜嘢舊帳？講緊嘅係陳肇始舊年五月八日喺社交網站Facebook上載一張抱住狗狗嘅舊照，當時佢貼文話當局同市民一樣都愛護動物，所以很明白市民嘅心情，仲話為咗進一步保障動物福利，會通過修例及加強執法，仲附加「#愛護動物」、「 #動物福利」、「#虐待動物可恥」、「#聆聽」、「#溝通」同「#行動」等語句。

當時呢個post出咗之後，好多網民要求佢要講得出做得到，亦叫佢唔好雷聲大雨點小，要維護動物權益，同埋要阻止虐殺動物嘅行為。之但係喺發生泰國小狗事件後，呢兩日有好多網民搵番呢個post，留言大罵政府講就天下無敵，又鬧爆漁護署處理手法絕不人道，亦有網友鬧爆陳肇始縱容手下胡亂殺狗，更有人叫佢道歉，甚至請辭咁話。