新聞處愛狗者提議漁護出力 偵緝犬助銷香港年報

《明報》，2013/7/17

今日喺會展開鑼嘅書展，除咗係大型書商天下，平時好少宣傳嘅政府新聞處都搞搞新意思，今日喺書展推出最新一期年報《香港2012》發售，仲搵咗狗狗嚟幫手宣傳呢本年報。新聞處中人話，以狗宣傳政府年報相信都係首次，佢哋挑選嘅其實係漁護署嘅檢疫偵緝犬。

Archie 好奇心強鍾意女仔

據Emily 了解，新聞處負責製作年報嘅官員之中有愛狗之人，諗到用狗嘅宣傳概念，於是同漁護署商量，漁護署認為可以收宣傳之效，於是喺8 隻偵緝犬之中，挑選咗兩隻粉墨登場，其中一隻係偵緝犬之中嘅大哥、雄性比格犬Archie。Archie 今年7 歲，2008 年1 月加入漁護署，該署網上顯示，Archie 嘅性格係「好奇心強，喜歡女孩子」，相當趣怪；另一隻影圖輯嘅偵緝犬係雌性拉布拉多犬， 「好奇主動，喜歡與人握手，最喜愛玩網球」，2011 年加入隊伍。

《香港2012》每冊218 蚊，除咗記錄過去一年同香港有關嘅統計資料同數據，亦有12 輯圖輯，以80 多張相展現香港嘅時人、時事、風貌、體育盛事、城市綠化、藝術活動。