愛心警捐電車底 手臂延伸救貓

《蘋果日報》，2018/5/4

馬路如虎口，噚日下晝3點幾，一隻4個月大頑皮貓B女衝出中環德輔道中，匿喺一架西行電車車底，幾乎命都冇，好彩個電車司機機警即刻停車報警。當時約咗朋友去中環High Tea嘅大學生陳小姐就見到警員瞓街救貓貓嘅溫馨場面，大讚「警員好落力，瞓晒街攞住支木棍同伸縮警棍伸入電車底，嘗試救貓！」

消防警員瞓街睇位

不過貓貓好高竇越匿越埋，最終匿咗喺電車中間底部，連警員用貓糧利誘都唔理，之後消防同愛協人員到場，大家齊齊瞓街趴地睇位嘗試拯救。當時愛貓之人梁小姐路過，佢亦自動留低上咗電車睇吓有冇嘢要幫手。佢話，當時坐喺車廂聽到車底傳出微弱貓叫聲，嗰刻好擔心。

之後消防員搵到貓貓匿藏位置，細細力揭開電車車廂嘅活門救出貓B，目擊過程嘅梁小姐話消防員好細心，為免貓B女受驚，用紅氈包住交愛協帶走。執番條命嘅貓B女現時喺愛協留醫，獸醫即刻幫佢洗白白，仲抹走雙眼嘅眼屎，查實貓B女今次真係好好彩，遇到機警司機，好心嘅梁小姐同瞓身拯救嘅一眾人員，所以真係要記住馬路勿亂走嘅道理。