何啟明議辦養流浪貓嚇走街坊

《東方日報》，2018/5/4

好多國家都禁止喺舖頭養寵物，而偏偏香港就反其道而行，唔少老舖都有養番一兩隻貓看門口，有時仲會變成區內嘅明星貓。最近喺深水埗一幢舊樓入面，有一間辦事處內，就發現一隻有分量嘅貓仔，經常坐喺接待處等客，不過就畀老闆投訴佢嚇走人啊！

邊個咁夠膽投訴？咪就係深水埗區議員何啟明（Kalvin）囉！Kalvin話一年前有同事執到隻流浪貓，傾過之後決定放喺辦事處度養，有時放假返嚟做嘢就有貓陪嘞。佢又話隻貓叫Mimi，但係男仔嚟，平時佢最鍾意坐喺近門口嗰個位，仲會幫手招呼吓班街坊。不過，怕貓嘅街坊就會叫Kalvin出去傾，唔敢上去辦事處嘞！