港大站肥鼠 等𨋢冇耐性 轉搭扶梯夾死

《蘋果日報》，2018/5/28

天文台連日錄得逾33°C高溫，打破5月最長嘅酷熱日數，天時「鼠」熱，入地鐵站嘆冷氣消暑最開心，估唔到連「米奇」都忍唔住喺站內歇一歇。有網民喺fb專頁「西環變幻時」發佈影片，話喺港鐵香港大學站發現老鼠，片中所見老鼠身形頗大，喺B2山道出口升降機口大模廝樣排隊「等𨋢」，完全「唔驚人」，但等候期間似乎不耐煩，竄入旁邊「私家秘道」離去。

有網民留言欲知老鼠去向，亦有人話其實佢係「等車返迪士尼樂園」。港鐵回覆指，職員確認5月24日下午收到乘客通知B2出口升降機附近發現老鼠，當時已即時派職員處理同檢查；至當晚約11點喺B2出口附近，發現有老鼠被扶手電梯「夾死」，職員已即時清潔及消毒。港鐵話之前亦曾收到有人喺B2出口附近發現鼠蹤，估計老鼠係喺外面走入車站，會加強留意，重申港鐵不時會清潔車站，會加強留意，保持衞生。